बाजार समित्या राष्ट्रवादीच्या ताब्यात

विधान सभा निवडणुकीत काँग्रेसचे माजी मंत्री हर्षवर्धन पाटील यांचा पराभव केल्यानंतर बाजार समितीवर आमदार दत्तात्रय भरणे यांनी वर्चस्व मिळविले. राष्ट्रवादी काँग्रेस पुरस्कृत शेतकरी विकास पॅनल च्या माध्यमातून काँग्रेस पुरस्कृत कर्मयोगी शंकरराव पाटील शेतकरी विकास पॅनलला आव्हान दिले होते.

राष्ट्रवादी काँग्रेसच्या स्थापनेनंतर सतरा वर्षांनी पहिल्यांदाच इंदापूर कृषी उत्पन्न बाजार समितीवर राष्ट्रवादी काँग्रेस पक्षाचा झेंडा फडकला आहे. काल या निवडणुकीसाठी ९८.७३ टक्के एवढे विक्रमी मतदान झाले होते.आज सकाळी नऊ वाजता शिक्षक पतसंस्थेच्या सभागृहात मतमोजणीस सुरुवात झाली.प्रारंभापासून काँग्रेस पक्ष व राष्ट्रवादी काँग्रेस पक्षाच्या पॅनलमध्ये अगदी घासून लढत चालली होती.दुपारी दीड वाजता कल येण्यास सुरुवात झाली.सोसायटी मतदार संघात राष्ट्रवादी काँग्रेसने चार तर काँग्रेसने तीन जागांवर आघाडी घेतली.मात्र काँग्रेसला नंतर ती टिकवता आली नाही.

सात पैकी सहा जागा राष्ट्रवादी काँग्रेसने जिंकल्या.त्यानंतर व्यापारी आडतदार मतदार संघ,हमाल तोलार मतदार संघ,ग्रामपंचायत सर्वसाधारण मतदार संघ,कृषी प्रक्रिया मतदार संघ यातील एकट्या दुकट्या जागा जिंकत काँग्रेसला सहा जागांवर समाधान मानावे लागले.सर्वसाधारण मतदार संघात प्रवीण काळे,दत्तात्रय फडतरे,इतर मागासवर्ग प्रवर्ग मतदार संघात काँग्रेसचे कांतीलाल झगडे,राष्ट्रवादी काँग्रेसचे गणेशकुमार झगडे व ग्रामपंचायत सर्वसाधारण मतदार संघात राष्ट्रवादी काँग्रेसचे तात्यासाहेब वडापूरे,व काँग्रेसचे रोहित मोहोळकर यांच्यामधील काट्यावरच्या लढतीत फेरमतदानाची मागणी करण्यात आली.त्याचा राष्ट्रवादी काँग्रेसच्या फडतरे व झगडे यांना त्याचा फायदा मिळाला.वडापूरे यांना पराभवाशी सामना करावा लागला.या ठिकाणी फडतरे यांना एका मताने तर गणेशकुमार झगडे यांना दोन मतांनी विजय मिळाला.या सर्व प्रकारामध्ये निवडणूक निकाल सात वाजून पन्नास मिनिटांनी जाहीर झाला. (वार्ताहर) बारामती : बारामती कृषी उत्पन्न बाजार समितीवर राष्ट्रवादी काँग्रेसने सत्ता कायम राखली आहे. निवडणुकीत पंचवार्षिक निवडणुकीमध्ये राष्ट्रवादी काँग्रेसच्या रयत पॅनलने सर्व १३ जागा जिंकून पुन्हा वर्चस्व प्रस्थापित केले. तसेच, राष्ट्रवादी काँग्रेस पुरस्कृत रयत पॅनलचे ६ उमेदवार बिनविरोध झाले आहेत. त्यामुळे सर्व जागांवर राष्ट्रवादीने विजय मिळविला आहे.

निवडणूक निर्णय अधिकारी एस. एस. कुंभार यांनी हा निकाल घोषित केला. राष्ट्रवादी काँग्रेसचे सुनील वसंतराव पवार, नारायण महादेव कोकरे, पुरुषोत्तम तुकाराम गदादे, प्रताप मधुकर सातव, नितीन शंकर सरक, अनिल धोंडिबा हिवरकर यांची यापूर्वीच बिनविरोध निवड झाली आहे.

राष्ट्रवादी काँग्रेसचे बारामती तालुकाध्यक्ष संभाजी होळकर म्हणाले, की आजचा विजय म्हणजे राष्ट्रवादी काँग्रेसने शेतकर्‍यांसाठी केलेल्या कामाची ही पावती आहे. युतीचे शासन शेतकरीविरोधी आहे. युती शासनाने घेतलेल्या विविध निर्णयामुळे शेतकर्‍यांचे नुकसान झाले आहे. त्यामुळे सरकारला चपराक म्हणून हा विजय मिळाला आहे. माजी केंद्रीय कृषिमंत्री शरद पवार, माजी उपमुख्यमंत्री अजित पवार यांच्या नेतृत्वावर दाखविलेला हा विश्‍वास आहे.

तसेच, या निकालाबाबत भाजपा नेते पुणे कृषी उत्पन्न बाजार समितीचे मुख्य प्रशासक दिलीप खैरे म्हणाले, की बाजार समितीचा निकाल अपेक्षित होता. जिल्हा बँकेशी संबंधित संस्थांवर पवारांची मक्तेदारी आहे. त्यामुळे या निवडणुकीतील मतदार निवडक आहे. हे कार्यकर्ते राष्ट्रवादी काँग्रेसचे अनेक वर्षांचे मतदार आहेत. आम्हाला मिळालेली मतेदेखील चांगली आहेत.

कृषी उत्पन्न बाजार समितीच्या पंचवार्षिक निवडणुकीतील राष्ट्रवादी काँग्रेस पक्षाचा विजय हा सर्वस्वी गोरगरीब जनतेचा मतदारांचा आहे. निवडणूक अटीतटीची होती. सहकारी संस्था मतदारसंघात बोगस संस्थांचा समावेश होता. त्याबाबत विरोधक वेगवेगळी वक्तव्ये करीत होते. त्यांच्याकडून खालच्या पातळीवर प्रचार झाला. अजित पवारांवर वैयक्तिक टीका करणे खेदजनक होते.
- दत्तात्रय भरणे, आमदार 

हा प्रामाणिकपणाचा विजय आहे. काम झाल्यावर आम्ही लोकांना कधीही वार्‍यावर सोडले नाही. कोणाचेही काम करताना एक रुपयामध्येही मिंधे झालो नाही. चांगल्या पद्धतीने काम करणार्‍या कार्यकर्त्यांना कृषी उत्पन्न बाजार समितीत काम करण्यासाठी संधी मिळाली आहे. विरोधकांनी केलेल्या खोट्या आरोपांना मतांद्वारे मतदारांनीच उत्तर दिले आहे.
- अप्पासाहेब जगदाळे, नवनिर्वाचित संचालक, कृषी उत्पन्न बाजार समिती विजयी उमेदवार

निर्मला अंकुश रणमोडे (१५९८ )
गणेशकुमार कृष्णा झगडे (१५४९)
 शिवाजी सत्यवान इजगुडे (१५६९)
आबा गणपत देवकाते (५६१ )
 यशवंत विठ्ठल माने (६२३)
 सचिन आगतराव देवकर (५८६)
मेघश्याम वामनराव पाटील ( ३0२)
 सुभाष ज्ञानदेव दिवसे (४0)
भानुदास खंडेराव सपकळ (१३ ).