हातभट्टीची बेकायदेशीर दारू बाळगल्याप्रकरणी एकास कोठडी

पुणे :- बेकायदेशीर हातभट्टीची दारू बाळगल्याप्रकरणी फरासखाना पोलिसांनी एकास अटक करून न्यायालयात हजर केले असता त्यास १९ नोव्हेंबरपर्यंत पोलीस कोठडीत ठेवण्याचा आदेश न्यायालयाने दिला आहे. रमेश उर्फ बापू हनुमंत गायकवाड (वय ४३, रा. पाषाण) असे कोठडी सुनाविलेल्याचे नाव आहे. याप्रकरणी पोलीस शिपाई अमेय अनिल रसाळ यांनी फिर्याद दिली आहे. १२ ऑक्टोबर रोजी पावणेपाच वाजण्याच्या सुमारास कसबा पेठेत कुंभारवेस चौकातील श्री खंडोबा मंदिराच्या विरुद्ध बाजूस शाहीर अमर शेख चौकाकडे जाणार्‍या रस्त्याच्या कडेला सार्वजनिक रस्त्यावर ही घटना घडली.

आरोपी गायकवाड याने कारमध्ये (एम.एच. १४ एच. ८४0६) २८0 लिटर गावठी हातभट्टीच्या तयार दारूचे ८ कॅन्ड माल बेकायदेशिररित्या स्वत:च्या आर्थिक फायद्यासाठी कारमध्ये बाळगला होता.त्यामुळे गुन्हा दाखल करण्यात आला आहे. याप्रकरणी अधिक तपास करावयाचा असल्याने आरोपीस पोलीस कोठडी द्यावी, अशी मागणी सरकारी वकील ए. के. पाचरणे यांनी केली, ती न्यायालयाने ग्राह्य धरली.